Professor Abduraxmonova Manzura Manafovna 2009-yildan buyon Farg‘ona davlat universitetida faoliyat ko‘rsatib, o‘zining pedagogik faoliyati davomida mamlakatimizda ijtimoiy fanlar rivojiga munosib hissasini qo‘shib kelayotgan olimalardan biri hisoblanadi.
M.Abduraxmonova 1986-1988 -yillarda Farg‘ona kooperativ texnikumining “tovarshunoslik va oziq-ovqat tovarlari bilan savdoni tashkil etish”, 1991-1996-yillar davomida Samarqand kooperativ institutining “nooziq-ovqat tovarlari tovarshunosligi” mutaxassisligi bo‘yicha tahsil olgan. Tahsil olish bilan birgalikda 1987-1990-yillar davomida Farg‘ona shahar komsomoli instruktori, 1990-1995-yillar davomida Farg‘ona shahar Markaziy univermag tovarshunosi, 1995-2009-yillar davomida o‘zi tomonidan ta’sis etilgan “Mohlaroyim” firmasi rahbari, 2009-2016-yillar davomida Farg‘ona davlat universiteti iqtisodiyot nazariyasi kafedrasi o‘qituvchisi, katta o‘qituvchisi, fan nomzodi (darajasi) va dotsent lavozimlarida, shuningdek, 2017-2022-yillar davomida Farg‘ona davlat universiteti ijtimoiy ish kafedrasi mudiri va bugungi kunda professori lavozimida faoliyat yuritib kelmoqda. Pedagogik faoliyat davomida оlima M.Abduraxmonova 2012-yil 13-iyul oyida 08.00.01 - “Kichik biznes va xususiy tadbirkorlik subyektlari faoliyatini davlat tomonidan qo‘llab-quvvatlashni takomillashtirish” mavzusida nomzodlik dissertatsiyasini (PhD) Toshkent Moliya instituti qoshidagi ixtisoslashgan ilmiy kengashda muvaffaqiyatli himoya qilgan va O‘zbekiston Respublikasi Oliy Attestatsiya Komissiyasi tomonidan 2012-yil 27-dekabr oyida iqtisodiyot fanlari nomzodi ilmiy darajasini, keyinchalik esa dotsentlik ilmiy unvonini qo‘lga kiritadi. Ushbu mashaqqatli yo‘lda unga ustozlari – iqtisodiyot fanlari doktorlari, professorlar Ahmadali G‘ofurov va Vaxabov Abduraxim Vasikovichlar nazariy va amaliy jihatdan qo’llab-quvvatlashib, yordam ko‘rsatadilar.
Shuningdek, 2023-yil iyul oyida “O‘zbekiston umumiy o‘rta ta'lim tizimida ijtimoiy ish faoliyatining shakllanishi” mavzusida 22.00.02 – «Ijtimoiy tuzilish, ijtimoiy institutlar va turmush tarzi» ixtisosligi bo‘yicha sotsiologiya fanlaridan doktorlik (DSc) dissertatsiya ishini himoya qiladi va ilmiy darajasini oladi. 2024-yilda professorlik unvoniga ega bo‘ladi.
Professor M.Abduraxmonovaning mamlakatimizda ijtimoiy fanlar taraqqiyotini rivojlantirishga bo‘lgan sa’y-harakatlari natijasida Farg‘ona davlat universitetida mavjud bo‘lgan “Ijtimoiy ish” kafedrasi tarkibida “Sotsiologiya” yo‘nalishi (hozirda alohida kafedra sifatida faoliyat yuritmoqda).
Ijtimoiy ish (fuqarolarni o‘zini o‘zi boshqarish organlari) maxsus sirtqi yo‘nalishi, aholini ijtimoiy himoya qilishga qaratilgan “Sug‘urta” yo‘nalishi (hozirda iqtisodiyot fakultetida faoliyat yuritmoqda) kabi yo‘nalishlarini ochilishiga ta’lim va me’yoriy hujjatlar, ya’ni ta’lim standartlari, o‘quv reja va dasturlarni topib, tayyorlab berish orqali ko‘maklashadi va natijada Farg‘ona davlat universitetida yangi yo‘nalishlar tashkil topadi. Shuningdek, Ijtimoiy ish yo‘nalishini rivojlanishini davom ettirish maqsadida Ijtimoiy ish kafedrasi tarkibida magistratura mutaxassisligi va sotsiologiyaning 22.00.02 – «Ijtimoiy tuzilish, ijtimoiy institutlar va turmush tarzi» ixtisosligi bo‘yicha doktorantura yo‘nalishlari shakllantiriladi. Bugungi kunda ushbu yo‘nalishlar nazariy va empirik tadqiqotlar uchun sifatli kadrlar tayyorlanishiga xizmat qilmoqda. Olimani atrofi shogirdlar bilan qamrab olingan.
Professor M.Abduraxmonova kadrlar tayyorlashda nafaqat milliy darajada balki xalqaro darajada ham xizmat qilib kelmoqda. Olima Qozog‘iston Respublikasining L. N. Gumilyov nomidagi Yevrosiyo milliy universitetida universitet ilmiy kengash qaroriga asosan “8D031-Ijtimoiy fanlar” ixtisosligi bo‘yicha dissertatsiya ilmiy kengashi a’zosi sifatida faoliyat yuritadi.
Professor M.Abduraxmonova doimiy ravishda o‘z malakasini, ilmiy-nazariy saviyasini oshirish maqsadida o‘zining ustida qat’iyat bilan ishlaydi. Professor-o‘qituvchilar orasida o‘zining bilimi, dunyoqarashi, mustaqil fikri, tirishqoqligi bilan ajralib turadi.
Olima tomonidan qisqa pedagogik faoliyati davrida o‘quv jihatdan “Maktabda ijtimoiy ish” (2022.), “Yordamga muhtoj bolalar bilan ijtimoiy ish”(2021.), “Xavf guruhidagi bolalar bilan ijtimoiy ish” (2024), “Ijtimoiy ish menejmenti” (2025.), “Bolalar va yoshlarni ijtimoiy himoyasi va ta’minoti” (2020.), “Ijtimoiy ishda qo‘llaniladigan namunaviy atamalar lug‘ati” (2024) va “Keksalar bilan ijtimoiy ish” kabi 10 dan ortiq darslik va qo‘llanmalari tayyorlanadi va nashr etiladi. Shuningdek, uslubiy jihatdan 2019-2024 o‘quv yillarida “Bola va uning oilasi vaziyatini baholashning samarali usullari” nomli, ”Ijtimoiy ishning huquqiy asoslari“ nomli, “Jamiyat ishchi xodimlarini ijtimoiy himoyalash tizimining innovatsion dasturi” nomli, “Umumiy ta’lim muassasalarida ta’lim islohotlari va sifatni oshirishga innovatsion yondashuv” nomli, “Umumiy ta’lim muassasalarida ijtimoiy ish amaliyotini amalga oshirish mexanizmlari” nomli, “Yordamga muhtoj o‘quvchilar bilan ijtimoiy ish amaliyotining innovatsion texnologiyalari” nomli, Umumiy ta’lim muassasalarida ijtimoiy ish amaliyotining innovatsion texnologiyalari” nomli, Ijtimoiy boshqaruvda jamoatchilik fikri samarali qaror qabul qilish omili” nomli, “Oila va bolalar vaziyatini majmuaviy baholashning samarali yo‘llari” nomli, “AQSHda nogironligi bor shaxslarni ijtimoiy himoya qilishning xususiyatlari” nomli ko‘plab qo‘llanmalari hammualliflikda yaratiladi va mualliflik huquqlari qo‘lga kiritiladi.
Ilmiy jihatdan “Kichik xo‘jalik yurituvchi tadbirkorlik subyektlarini rivojlantirishning mintaqaviy ijtimoiy-iqtisodiy xususiyatlari” (2008y), “O‘zbekistonda kichik biznes va xususiy tadbirkorlik faoliyatini davlat tomonidan qo‘llab-quvvatlashni takomillashtirish” (2014y.), O‘zbekistonda korporatsiyalarni boshqarish: muammolar va rivojlanish tendensiyalari”(2019y.), “O‘zbekistonda tadbirkorlik faoliyatini rivojlantirishning ijtimoiy va iqtisodiy asoslari” (2020y.), “O‘zbekiston umumiy o‘rta ta’lim tizimida ijtimoiy ish kasbiy faoliyatini shakllantirish mexanizmlari” (2021y.), “Xavf guruhiga mansub bolalar bilan profilaktik tadbirlarni amalga oshirishda ijtimoiy ish mexanizmlari” (2021y. Rossiya YUFU bilan hamkorlikda), O‘zbekiston umumiy o‘rta ta’lim tizimida ijtimoiy ishning shakllanishi (2023y.), “O‘zbekistonda pensiya tizimini takomillashtirish masalalari” (2024y.), “Umumiy ta'lim muassasalarida bolalar zo‘ravonligi profilaktikasida ijtimoiy ish kasbi faoliyati samaradorligini baholash (aniqlash) mexanizmlari”, Boshqaruvda xususiy ijtimoiy ishning nazariy metodologik asoslari (2025y.), “Ta'lim tizimida ijtimoiy ish kasbiy faoliyati orqali zo‘ravonlikni yumshatish mexanizmlari” (2025) kabi monografiklari yaratiladi va chop etiladi. Shuningdek, bugungi kunda qadar 200 dan ortiq milliy va xalqaro darajadagi ilmiy jurnallarda maqolalari, tezislari, o‘quv-uslubiy qo‘llanmalari chop etilgan. Olima Rossiya, Amerika Qo‘shma shtatlari (AQSH), Polsha, Qozog‘iston, Qirg‘iziston kabi mamlakatlarda o‘tkazilgan nufuzli konferensiyalarda ma’ruzalari bilan qatnashgan. Xalqaro ilmiy jurnallarda tahrir a’zosi sifatida faoliyat ham yuritib keladi.
Professor M.Abduraxmonova innovatsion g‘oyalar, texnologiyalar va loyihalarni rivojlantirishga maqsadida “Imkoniyati cheklangan bolalar ijtimoiy - madaniy faoliyatining badiiy-ijodiyot vositalari asosida nazariy va amaliy takomillashuvi” nomli fundamental davlat loyihasi a’zosi, “Jamiyat ishchi xodimlarini ijtimoiy himoyalash tizimining innovatsion dasturi” (Kvars aksionerlik jamiyati misolida) nomli loyiha rahbari, “Qurilish materiallari va qurilish mollari bozorining marketing tahlili” loyiha rahbari sifatida olib borgan faoliyatida har bir yo‘nalishlar bo‘yicha ilmiy-tadqiqotlarni amalga oshiradi va muammolar yechimini topishga intiladi va xizmat qiladi.
Olima M.Abduraxmonova maktab o‘quvchiligida, paxta dalalarida paxta terib yurgan kezlarida, “xirom etik” kiygan rais ayollarni ko‘rib, ularga havas qilar ekan, oldiga “kelajakda albatta o‘qimishli, hammaga nafi tegadigan inson bo’laman” degan maqsadni qo‘yib kelgan va ushbu maqsad yo‘lida intilgan. Pedagogik faoliyati davomida ham, ona sifatida ham o‘zining oila a’zolariga hamda ta’limiy faoliyatining mazmunida talaba yoshlarga ilmiy, kasbiy bilim va ko‘nikmalar berish, ularni kasbiy mahoratini oshirish bilan birga ularga hayotiy ko‘nikma, saboqlar berishi hamda oila, talabalar turar joyi, maktab va mahallalarda oilalar, bolalar va yoshlar bilan ishlashi, ulardagi muammolarni aniqlash orqali e’tiborni muammolar yechimiga qaratishi, olimaning nafaqat ilmiy emas balki ilmiy g‘oyalar asosida jamiyat hayotiga, uning ravnaqi va rivoji uchun hissa qo‘shib kelayotganligidan dalolat beradi va ushbu jamiyatning faol hamda munosib a’zosi va o‘z o‘rniga egadir.
Professor M.Abduraxmonova pedagogik faoliyati davomida rahbariyat tomonidan topshirilgan barcha topshiriqlarni o‘z vaqtida bajarib, jamoatchilik ishlarida, shuningdek universitet kasaba uyushmasining taftish komissiyasi raisi, fakultet Murabbiylar kengashi raisi lavozimlarida faoliyatni amalga oshiradi.
Fakultetning ilmiy faoliyatida faol ishtirok etib, professor-o‘qituvchilarning dars mashg‘ulotlarida, ilmiy ishlar muhokamalarida qatnashib, o‘z fikr va mulohazalarini bildirib keladi. Olimada ilmiy faoliyat yuritishga qiziqishning kuchliligi, tezkorlik bilan ijtimoiy-iqtisodiy hodisa va jarayonlarni ilg‘ab olishga moyilligining yuqoriligi, uning qator yutuqlarga erishishiga yordam beradi.
Manzura Abduraxmonova intizomliligi, mehnatsevarligi, siyosiy-ijtimoiy jihatdan dunyoqarashining kengligi, ma’naviy boyligi bilan ajralib turadi hamda universitet rahbariyati tomonidan yuklatiladigan vazifalarni bajarishga mas’uliyat bilan yondashadi.
Shuning uchun ham Farg‘ona davlat universiteti rahbariyati va ilmiy jamoasi olima M.Abduraxmonovani Yangi O‘zbekistonda amalga oshirilayotgan islohotlarning haqiqiy ishtirokchisi, shogirdlariga mehribon ustoz, ilm va fan fidoyisi hamda zabardast olimasi sifatida biladi.